बाढी, पहिरो, डुबानमा परेर मृत्यु भएकाको सम्झनामा सरकारले देशभर तीन दिन राष्ट्रिय शोकको घोषणा

सरकारले तीन दिन राष्ट्रिय शोक घोषणा गरेको छ । बाढीपहिरोले ठूलो जनधनको क्षति भएपछि सोमबार बसेको मन्त्रिपरिषद् बैठकले राष्ट्रिय शोकको घोषणा गरेको हो ।

बाढी, पहिरो, डुबानमा परेर मृत्यु भएकाको सम्झनामा सरकारले देशभरका सरकारी कार्यालय र नियोगहरूमा राष्ट्रिय झण्डा आधा झुकाई आजदेखि तीन दिन राष्ट्रिय शोकको घोषणा गरेको छ ।

प्रधानमन्त्री केपी शर्मा ओली स्वदेश फर्किएलगत्तै सोमबार साँझ प्रधानमन्त्री निवास बालुवाटारमा बसेको मन्त्रिपरिषद् बैठकले उक्त निर्णय गरेको हो ।

बाढी, पहिरो तथा डुबानमा परेर ज्यान गुमाएका व्यक्तिको परिवारलाई जनही २ लाख रुपैयाँ र बेपत्ता रही १० दिनसम्म फेला नपरेकाका परिवारहरुलाई पनि मृतक सरह कै राहत प्रदान गर्ने मन्त्रिपरिषद् बैठकले निर्णण गरेको छ ।

बैठकमा गृहमन्त्री रमेश लेखकले समग्र स्थितिबारे मन्त्रिपरिषद्मा जानकारी गराउँदै उहाँले बाढी पहिरोमा परी सोमबार साँझसम्म २ सय ९ जनाको मृत्यु भएको, २९ जना बेपत्ता भएको, २ सय ४८ जना घाइते भएको र ७७२२ जनाको उद्धार गरिएको विवरण पेश गर्नुभएको थियो ।

सरकारले दैवी प्रकोप उद्दार कोषमा १ अर्ब जम्मा गर्ने निर्णय गरेको छ । सबै मन्त्रीहरूले एक महिनाको तलब पनि उक्त कोषलाई दिने निर्णय भएको छ ।

प्रधानमन्त्री ओलीले आवश्यक राहत, उद्धार र क्षति सम्बन्धी सबै विवरण संकलन गर्न गृह, स्वास्थ्य, पूर्वाधार, खानेपानी, ऊर्जा मन्त्रीलाई निर्देशन दिनुका साथै सबै राजमार्गलाई छिटोभन्दा छिटो सञ्चालनमा ल्याउन सबै कदम उठाउन र आवश्यक पर्ने कामको प्रतिवेदन ल्याउन सम्बन्धित मन्त्रालयलाई निर्देशन दिनुभएको छ ।