म्याग्दी जिल्लामै पहिलो पटक अकबरे (डल्ले) खुर्सानीको व्यावसायिक खेती

म्याग्दी जिल्लाको बेनी नगरपालिका–३ भकिम्लीका किसानहरुले पहिलो पटक अकबरे (डल्ले) खुर्सानीको व्यावसायिक खेती गरेको छ ।

कृषि ज्ञान केन्द्र म्याग्दीका प्रमुख सञ्जीव बास्तोलाका अनुसार – भूगोल र हावापानी अनुकूल भएकाले भकिम्लीको व्यावसायिक अकबरे खुर्सानीखेती सफल देखिएको बताउदै भकिम्लीका किसानले व्यक्तिगत र सामूहिक रुपमा व्यावसायिक अकबरेखेती गर्न थालेका जानकारी दिनुभयो ।

भकिम्लीको गङ्गा पशुपक्षी तथा फलफूल कृषि फार्मका सञ्चालक खिमबहादुर आले मगरले कोदो, मकैलगायत परम्परागत खाद्यबालीको विकल्पमा सात रोपनी जमिनमा हालसम्म उत्पादन भएको सात सय किलोग्राम अकबरे खुर्सानी बेचेर रु एक लाख ७५ हजार आम्दानी गरेको बताउनुभयो ।

बेलढुङ्गा कृषक समूहका सचिव भीमबहादुर रोकाका अनुसार – ताप्लेजुङबाट बीउ ल्याएर परीक्षणका लागि गरेको अकबरे खुर्सानी खेती सफल भएपछि व्यावसायिक खेती थालेको हो।

१९ जना किसानले रु पाँच/पाँच लाखका दरले लगानी गरेर ३५ रोपनी जग्गा भाडामा लिएर अकबरे (डल्ले) खुर्सानी सहित अन्य खेती सञ्चालन गरेका छन् ।

भकिम्लीका किसानलाई तरकारी खेती प्रवर्धन कार्यक्रम मार्फत उपलब्ध अनुदान रकमले अकबरे (डल्ले) खुर्सानीको व्यावसायिक खेती गरेको कृषि ज्ञान केन्द्र म्याग्दीका प्रमुख बास्तोलाले बताउनुभयो ।