रवि लामिछानेलाई पक्राउ गरेको विरोधमा रास्वपा चितवनले शनिबार पनि प्रदर्शन

पूर्व गृहमन्त्री एवं पार्टी सभापति रवि लामिछानेलाई पक्राउ गरेको विरोधमा रास्वपाले भरतपुरको लायन्स चोकबाट पुलसम्म र्याली गरेको हो ।

प्रदर्शनमा सहभागीहरूले ‘असली सहकारी ठगलाई कारबाही गर’, ‘सहकारी पीडितलाई न्याय दे’, ‘कर छल्नेलाई कारबाही गर’, ‘मिडिया ट्रायल बन्द गर’, ‘माफियाहरूलाई कारवाही गर’, ‘भ्रष्ट सरकार मुर्दावाद’, ‘नडराउ रवि दाई-जनता तिम्रो साथमा छ’, ‘रवि दाइ हाइ हाइ’ लगायतका नारा लगाए ।

कार्यक्रममा जिल्ला सभापति कृष्ण प्रसाद भुसालले नियतवस पार्टी सभापति लामिछानेलाई पक्राउ गरिएको बताए। सरकारको गलत कदम विरुद्द सबै एकजुट हुन उनले आग्रह गरे। उनले निष्पक्ष र स्वतन्त्र अनुसन्धान हुनुपर्ने बताए। सहकारी प्रकरणमा सत्तारुढ पार्टीका व्यक्तिलाई छोड्ने र रवि लामिछानेलाई मात्र कारबाहीको दायरामा ल्याउनु भेदभाव देखिएको उनको भनाइ छ ।

सहकारी ठगी प्रकरणमा कास्की जिल्ला अदालतले रास्वपा सभापति लामिछानेविरुद्ध प्रहरीलाई पक्राउ गर्ने अनुमति दिएपछि प्रहरीले गत शुक्रबार साँझ पार्टी केन्द्रीय कार्यालयबाट पक्राउ गरेको थियो ।