जसपा नेपाल चितवनको समीक्षात्मक बैठक आज भरतपुरको सगुन पार्टी प्यालेसमा सम्पन्न भएको छ। उक्त बैठकमा जिल्लाका सातवटै पालिकाका अध्यक्षहरू, पालिका अभियानकर्ताहरू, जबस/मोर्चाका केन्द्रीय नेताहरू, स्वयंसेवक फोर्स, महिला, विद्यार्थी, जनजाति, दलित, सुकुम्बासी लगायतका नेता तथा कार्यकर्ताहरूको उपस्थिति थियो।
चितवन जिल्लाका प्रमुख अभियन्ता तथा पार्टी केन्द्रीय कार्यकारिणी समिति सदस्य तारा बिस्वकर्माले सहजीकरण गरेको कार्यक्रममा, अभियानका क्रममा सबै पालिकामा भएका पार्टी तथा मोर्चा संगठनका कामको समीक्षा गरिएको थियो। उपस्थित नेताहरूले आ-आफ्नो जिम्मेवारी अन्तर्गतको प्रगतिबारे प्रतिवेदन प्रस्तुत गरेका थिए।
बैठकले केही कमी कमजोरीका बाबजुद अभियान सफल भएको ठहर गर्दै पार्टी कार्यकारिणी समितिले अभियानको समयावधि थप दुई महिना लम्ब्याउने निर्णय गरेको छ। बैठकमा बाँकी रहेका संगठनका कामहरू पूरा गर्ने र अभियानलाई थप सशक्त बनाउने योजना समेत तय गरियो।
यसैक्रममा, जिल्ला अध्यक्ष मुस्तफा अलीले स्वास्थ्य र पारिवारिक कारण देखाउँदै पदबाट राजीनामा दिएका छन्। उपाध्यक्षले पनि व्यक्तिगत कारण सक्रिय रूपमा काम गर्न नसकेको भन्दै पदबाट अलग रहने निर्णय गरेपछि नयाँ नेतृत्व चयन गरिएको छ।
पार्टीका वरिष्ठ सदस्य तथा महानगर अध्यक्ष अनुज जोशीको संयोजकत्वमा ५१ सदस्यीय जिल्ला अधिवेशन आयोजक समिति गठन गरिएको छ। अभियान र जिल्लाको कामलाई सहज बनाउन अनुज जोशीको नेतृत्वमा १७ सदस्यीय जिल्ला सचिवालय समिति पनि गठन गरिएको छ।
पार्टीका नेता तारा बिस्वकर्माले नवगठित समितिहरूलाई कार्यसफलताको शुभकामना दिँदै बैठकको समापन गरेका छन्।
प्रतिकृया दिनुहोस्