देवघाटमा सोमबारे बोलवम मेला आजबाट सुरु

नेपालकै पवित्र तीर्थस्थल देवघाटमा सोमबारे बोलवम मेला आजबाट सुरु भएको छ । आइतबार साँझ देखिनै देवघाटमा मेला भर्न आएका दर्शनार्थीको आज बिहानैदेखि पूजाआजामा भीड देखिएको छ ।

साउन महिना वर्षकै चोखो महिनाको रुपमा लिइने गरिएको र साउनमा पाँच वटा सोमबार परेकाले आजदेखि साउन अन्तिमसम्म मेला आयोजना गरिएको देवघाट क्षेत्र विकास समितिले जनाएको छ । नेपालका विभिन्न जिल्लासहित भारतबाट समेत यहाँ श्रद्धालु भक्तजन यहाँ आउने गर्दछन् ।

हरेक आइतबार विहान ४ बजेदेखि नै पुजाआजा र मेला चल्ने छ । यहाँ आएर शिवलाई जल चढाए पुण्य हुने र मनोकामना पूरा हुने विश्वास छ । देवघाट चितवन, नवलपरासी र तनहुँको सङ्गमस्थलमा पर्छ ।

कोभिड–१९ संक्रमणका कारण २ वर्ष औपचारिक रुपमा बोलबम मेला भएको थिएन । कार्यकारी निर्देशक धिरणबाबु घिमिरेले भक्तजनको सुरक्षाका लागि चितवन र तनहुँ प्रशासन र प्रहरीसँग समन्वय गरिएको बताउनुभयो ।

स्नान क्षेत्रमा उद्वारका लागि बोटे समाज, शशस्त्र र नेपाली सेनाका उद्वारक टोलीहरु परिचालन गरिने जनाइएको छ । स्नान गर्ने ठाँउमा डुङगा र तालिम प्राप्त सुरक्षाकर्मी तैनाथ गरिने छ । देवघाट क्षेत्र विकास समितिले चितवन र तनहुँतर्फ राखेका सचिवालयबाट जनचेतनामूलक जानकारी तथा सूचनाहरु प्रवाह गर्ने व्यवस्था मिलाइएको छ