फोनिज चितवनको कार्यालय स्थापना

---

फोनिज चितवनले संस्था स्थापना भएको करिब डेढ दशकपछि आफ्नै कार्यालय स्थापना गरेको छ । शुक्रबार इच्छाकामना गाउँपालिकाका अध्यक्ष दानबहादुर गुरूङ, नेपाल आदिवासी जनजाति महासंघ चितवनका अध्यक्ष महेन्द्र दुरा, पूर्वअध्यक्ष पदमबहादुर गुरूङ, फोनिज चितवनका संस्थापक अध्यक्ष सन्तकुमार चौधरीलगायतको उपस्थितिमा कार्यालय उद्घाटन गरिएको हो ।

कार्यालयको उद्घाटन गर्दै कार्यक्रमका प्रमुख अतिथि इच्छाकामना गाउँपालिका अध्यक्ष दान बहादुर गुरुङले आदिवासी जनजाती पत्रकारहरुको कार्यालय स्थापना भएकोमा खुशी व्यक्त गरे । उनले फोनिज चितवनको कार्यालय संचालनका निम्ति आवश्यक सहयोगको लागि आफु सदैव तयार रहेको पनि प्रतिबद्धता व्यक्त गरे ।

नेपाल आदिवासी जनजाति महासंघ (नेफिन) चितवनले फोनिजको लागि कार्यालय उपलब्ध गराएपछि स्थापना दिवसकै दिनमा उद्घाटन गरिएको फोनिज चितवनका अध्यक्ष रमेश रानामगरले जानकारी दिए । नेफिन चितवनले फोनिज चितवनलाई आफ्नै सदस्य भएकोले साथ र सहयोगको लागि कार्यालय उपलब्ध गराएको अध्यक्ष महेन्द्र दुराले बताए ।

नेफिनकै भवनमा फोनिजको कार्यालय स्थापना गराउँदा फोनिज र नेफिनबीचको सम्बन्धलाई अझ मजबुद हुने उनले बताए । ‘हामी सँगसँगै भएपछि सहकार्य गर्न सजिलो हुन्छ, नेफिनले आयोजना गरेका हरेक गतिविधिलाई फोनिजले पनि नजिकबाट नियाल्न पाउँछ,’ उनले भने ।

नेफिनमा पदमबहादुर गुरूङ अध्यक्ष हुँदा गठन भएको फोनिजले बल्ल कार्यालय पाएको भन्दै फोनिज चितवनले नेफिनप्रति धन्यवाद दिएको छ । नेफिनका पूर्वअध्यक्ष गुरूङले सुरूवाती समयमा फोनिजमा सदस्य पु¥याउनै मुस्किल भएको स्मरण गराउँदै अहिले फोनिज आफैँमा बलियो भइसकेको बताए ।

फोनिज चितवनका संस्थापक अध्यक्ष एवम् संरक्षक सन्तकुमार चौधरीले फोनिजले कार्यालय पाएपछि फोनिजले संस्थागतरूपमा उपस्थिति बलियो बनाएको बताए । फोनिजका संघीय समिति सदस्य एवम् तमू सञ्चारकर्मी संघका संघीय सचिव चित्र ‘सोल्टी’ गुरूङले फोनिजलाई अझ बलियो बनाउन अर्थ व्यवस्थाप्रति ध्यान दिन आग्रह गरे । संस्था सञ्चालनको लागि नियमित खर्च व्यवस्थापनलाई दीगो समाधान गराउन उनले आग्रह गरे ।

फोनिज बागमती प्रदेशका उपाध्यक्ष राजेश रूम्बाले फोनिजलाई स्थानीय सरकारहरूले संरक्षण दिन सके अझ बलियो हुने बताए । यसैविच नेवा पत्रकार चितवन दबुका अध्यक्ष एवं युगिन खबरका सञ्चालक अनुज जोशीले फोनिज चितवनको दुई महिनाको घरभाडा तिर्ने वताउनुभएको छ ।