खैरहनीमा खिचरा महोत्सव हुँदै, भेषभूषामा आउनेलाई निःशुल्क प्रवेश

---

चितवनको खैरहनीमा पुस २९ गतेबाट ‘आठौं खिचरा महोत्सव’ सुरु हुने भएको छ । थारु कल्याणकारिणी सभाद्वारा आयोजित आठौं खिचरा महोत्सवको शनिबार पत्रकार सम्मेलन मार्फत जानकारी गराइएको हो ।

महोत्सव मूल आयोजक समितिका संयोजक कृष्णलाल चौधरीले विविध भाषा धर्म संस्कृतिको संरक्षण एवं पर्यटन प्रबर्द्धनका उद्देश्यले खिचरा महोत्सव गर्न लागिएको बताए । संयोजक महतोका अनुसार महोत्सव सम्पन्न गर्नका लागि १५१ सदस्यीय मुल आयोजक समिति गठन गरिएको छ । उनले ३३ वटा उपसमिति बनाएर महोत्सवको तयारी गरिएको जानकारी दिए ।

उनले हालसम्म राज्यको कुनै पनि निकायबाट कुनै पनि सहयोग नभएको गुनासो समेत गरे । हालसम्म फाइदा नभएको बताउँदै उनले महोत्सवलाई जारी राख्ने प्रमुख उद्देश्य भएको जिकिर गरे ।

महोत्सवमा थारु लगायत विभिन्न जातजातिका परम्परागत भेषाभुषासहित सांस्कृतिक प्रस्तुती, स्थानीय तथा राष्ट्रिय कलाकारको प्रस्तुति, थारु समुदायको विशेष परिकार, थारु संग्रहालय तथा अनुसन्धान केन्द्र व्यवस्थापन गर्ने, होमस्टे संरक्षण र प्रवद्र्धन मार्फत आन्तरिक तथा बाह्य पर्यटक भित्र्र्याउन महोत्सवले सहयोग पुग्ने उनको भनाइ छ ।

जनजातिको भेषभूषामा आउने दर्शकलाई निःशुल्क प्रवेशको व्यवस्था गरिएको छ भने अन्यलाई प्रवेश शुल्क ५० तोकिएको छ । विगत दुई वर्ष कोभिडका कारण संचालन हुन नपाएको महोत्सव यस वर्ष भने संचालनमा आउँदै छ ।

उक्त महोत्सव प्रारम्भमा दुई दिनका लागि गरेको भए पनि हाल ११ दिनसम्म संचालन हुने आयोजकले जनाएको छ । महोत्सव पुस २९ गतेबाट सुरु हुने महोत्सव माघ ९ गतेसम्म संञ्चालन हुने बताइएको छ ।

वि.सं. २०७० सालबाट सुरु भएको महोत्सव अहिले थारु समुदायको नयाँ वर्षको अवसरमा मनाईदै आएको छ । थारु समुदायको सांस्कृतिक महोत्सवको रुपमा रहेको यो हरेक वर्ष आयोजना गर्दै आएको छ ।

महोत्सवमा १२० वटा स्टल रहने छन् भने रु ५५ लाखको खर्चमा हुन लागेको महोत्सवमा ५० हजारले अवलोकन गर्ने अनुमान आयोजकले गरेको छ ।