सिर्सिया नदी प्रदुषण नियन्त्रण गर्न नदी क्षेत्रमा रहेका उद्योगहरुको अनुगमन

सिर्सिया नदी प्रदुषण नियन्त्रण गर्न नदी क्षेत्रमा रहेका उद्योगहरुको अनुगमनको क्रममा वीरगञ्ज महानगरपालिकाभित्र सञ्चालित उद्योगले सिर्सिया नदीमा सिधै फोहोर पानी पठाउने गरेको पाइएको छ। नदी आसपास रहेका उद्योगहरुले उद्योगबाट निस्कने रसायनयुक्त प्रदुषित पानी प्रशोधन नगरी सिधै नदीमा खसाउने गरेका छन् । जसका कारण सिर्सिया नदीमा कालो पानी बग्ने गरेको तथ्य सार्वजनिक भएको छ।                                                                                          मंगलबार वीरगञ्ज महानगरपालिका–२१ सिर्सिया आसपास रहेका ४ वटा उद्योगको अनुगमन गरेको थियो । निधि टेक्सटायल्स प्रालि, ब्रिटानिया नेपाल, शक्ति दाल मिल र शक्ति वायरको अनुगमन गर्दा उद्योगहरुबाट निस्कने फोहोर पानी सोझै नदीमा मिसाउने गरेको पाइएको अनुगमन टोलीले जनाएको छ।वीरगञ्ज महानगरपालिकाका उपमेयर इम्तियाज आलमको संयोजकत्वमा गएको अनुगमन समितिले सो तथ्य सार्वजनिक गरेको छ ।                                                                                                                          उद्योगले अहिलेसम्म पानी प्रशोधन केन्द्र नबनाएको पाइएको वीरगञ्ज महानगरपालिका वातावरण शाखाका प्रमुख देवेन्द्र चौधरीले बताए।‘निधिले छायी (खरानी) पनि नदीमै फाल्ने गरेको रहेछ’,उनले भने, ‘ट्रिटमेन्ट प्लान्ट निर्माण गर्न र आइन्दा छायी नदीमा नफाल्न भनेका छौं।’                                                                                                            अनुगमन  टोलीले पनि नाला लगेर नदीमा जोडेको भेटेको छ । शक्ति वायर उद्योगले पानी जम्मा गर्न पोखरी बनाएको भएपनि प्रभावकारी नहुँदा फोहोर पानी नदीमा नै मिसिने गरेको देखिएको छ । शक्ति दाल उद्योगले पानी प्रशोधन केन्द्र बनाएको छैन ।बिस्कुट उत्पादन गर्ने मल्टिनेसनल कम्पनी ब्रिटानियाले पानी प्रशोधन केन्द्र बनाएको भएपनि प्रशोधन नगरेको फोहोर पानी सोझै नदीमा मिसाइदिने गरेको स्थानीयले बताएका छन्।                                                                                              ‘शक्ति दाल मिलको अन म्याद गुज्रेको कुहिएको दाल भेटिएको छ।‘ब्रिटानियाको संरचना राम्रो छ। पानी प्रशोधन केन्द्र भएपनि झुक्याएर नदीमा फोहोर पानी खसाल्ने गरेको देखियो । त्यसो नगर्न चेतावनी दिएका छौं।सम्बन्धित निकायलाई अध्ययनका लागि पठाएका छौं।उनले भने कतिपय उद्योगमा पानी प्रशोधन केन्द्र नै देखिएन । उद्योगले फोहोर पानी प्रशोधन नगरी फाल्न पाइदैन, दाल मिलमा कुहिएको दाल छ जसले गर्दा  नगरबासी विरामी हुने अवस्था छ। उनीहरुले अटेर गरे आवश्यक कानुनी कारबाहीका लागि प्रक्रिया थाल्छौं ।’                                                                                                                                        वीरगञ्ज महानगरपालिकाका मेयर राजेशमान सिंहको उपस्थितिमा आइतबार बसेको बैठकले सिर्सिया नदी प्रदुषण नियन्त्रणका लागि उद्योगहरुको अनुगमन गर्ने निर्णय गरेको थियो । समितिले हरेक साताको मंलबार बिहान ९ बजेदेखि १२ बजेसम्म सिर्सिया नदी आसपास रहेका उद्योगको स्थलगत निरीक्षण गर्नेछ।टोलीलाई नदीको नापजाँच गरी ‘राइट अफ वे’ तय गरेर प्रतिवेदन बुझाउन एक महिनाको समय दिइएको छ ।