ठूलो प्रयत्नले प्रचण्डजीको नेतृत्वमा गठबन्धनको सरकार बनाएका छौं : उपप्रधानमन्त्री खड्का

उपप्रधान तथा रक्षामन्त्री पूर्णबहादुर खड्काले सरकारले अर्थतन्त्रको सुधार र सुशासन स्थापित गराउने पक्षमा काम गरिरहेको बताएका छन् । कांग्रेसनिकट निजामती कर्मचारीको भेलालाई सम्बोधन गर्दै उनले यस्तो बताएका हुन् ।

उनले भने, ‘हामीले संघीय लोकतान्त्रिक गणतन्त्रको संविधान जारी गरिसकेपछि संविधानले परिकल्पना गरेको ऐनहरू अगाडि बढाउने बिषयमा जति चाँडो ल्याउनुपर्थ्यो । त्यो सकेनौं । अहिले संघीय निजामती ऐनलाई चाँडै संसदमा दर्ता गराउने प्रतिबद्धता छ । लोक सेवाको रायपछि एकसाताभित्र संसदमा पेश हुन्छ ।’ निजामती सेवा ऐन सिंगो देश र जनताको हितमा बन्ने खड्काले बताए ।