बेलायतमा रविको चार दिन, गोर्खा मुद्दा र विद्यार्थीका समस्यालाई प्राथमिकता

नेपाली दूतावासमा तय भेटघाटका क्रममा पनि बेलायतवासी नेपालीका माग र समस्याको बारेमा छलफल गर्ने उनले आश्वासन दिए । दूतावासको क्षेत्राधिकारको बारेमा आफूलाई जानकारी भएकोले दूतावासमा सम्भव नहुने विषयलाई आगामी संसद्मा कुरा राख्ने उनले बताए ।

बेलायतमा विद्यार्थीहरूले ठुलो समस्या भोग्नुपरेको विषयमा आफू जानकार भएको र यसका लागि आफू र आफ्नो पार्टीको तर्फबाट सक्दो पहल गर्ने र बेलायतमा एउटा ‘हेल्प डेस्क’ सञ्चालन गर्ने तयारी भइरहेको उनले बताए । यहाँका नेपालीहरूले भोग्नुपरेका समस्यालाई उक्त हेल्प डेस्कमार्फत समस्या समाधान गर्न आफ्नो पार्टीले काम गर्ने भएकाले यसका लागि सहयोग गर्न उनले बेलायतवासीसँग आग्रह पनि गरेका छन् ।

कार्यक्रममा लामिछानेले भूपू गोर्खाका मुद्दा, नागरिकता सम्बन्धी हालै लागू गरिएको विधेयक, राष्ट्रिय स्वतन्त्र पार्टीसँग सम्बन्धित विषयमा राखिएका जिज्ञासालाई प्रस्ट्याएका थिए । ‘म तपाईंहरुका समस्या र मुद्दालाई सम्बन्धित ठाउँमा पुर्‍याउने प्रयास गर्नेछु, तर के कसरी र कहिले सम्बोधन हुन्छ भन्ने बारेमा ग्यारेन्टी गर्न नसके पनि आफ्नो पार्टीले निरन्तर घच्घच्याउने छु’, उनले भने ।

अरु पार्टी जस्तो विदेशमा भातृ संस्था खोलेर रकम सङ्कलन गर्ने र परिवारका सदस्यलाई राजनैतिक जिम्मेवारी दिने आफ्नो पार्टीको नीति नभएकाले सच्चा र अनुभवी व्यक्तिले मात्र जिम्मेवारी पाउने उनले प्रष्टयाए ।

कार्यक्रममा ब्रिटिस गोर्खा नेपाली नागरिकता निरन्तरता (सीएनसीबिजी) ले गोर्खाली हाम्रो पहिचान वंशजको नागरिकता हाम्रो अधिकार भन्ने नारासहितको ज्ञापनपत्र हस्तान्तरण गरे ।

पूर्व गोर्खाहरुले नेपाली नागरिकता ऐन २०६३ को दफा १० को उपदफा १ संशोधन गरि त्रिपक्षीय सन्धि अन्तर्गत भर्ती भएका गोर्खा तथा निजका सन्ततिहरुको नागरिकता निरन्तर कायम रहने व्यवस्था कायम गरियोस् भन्ने माग राखेका छन् ।

यसैगरी भूपू गोर्खारुलाई नेपाल सरकारले बेवास्ता गरेको भन्दै आफ्ना मुद्दालाई सम्बोधन गर्न पहल गरिदिन आग्रह गर्दै परि आएमा राष्ट्रिय स्वतन्त्र पार्टीलाई ज्यान दिएर अघि बढ्ने अनसनकर्ता गोर्खा धनबहादुर गुरुङले बताए ।

गैरआवासीय नेपाली सङ्घका उपाध्यक्ष रामशरण सिम्खडाले सरकारद्वारा लागू गरिएको नागरिकता सम्बन्धी विधेयकको स्वागत गर्दै वितरण प्रक्रियामा सहज गरिदिन आग्रह गर्दै ज्ञापनपत्र हस्तान्तरण गरे । जसको सहजताका लागि गैरआवासीय नेपाली सङ्घले काठमाडौँमा हेल्प डेस्क स्थापना गरेको पनि उनले बताए ।

रास्वपा ‘प्रवास नेपाली सम्पर्क विभाग युके’ को निमन्त्रणामा बेलायत आएका लामिछानेले यहाँस्थित नेपाली समुदायसँग विभिन्न स्थानमा अन्तरक्रिया गरेका छन् । बुधबार उनले लन्डनस्थित नेपाली दूतावास तथा बेलायती संसद भवनमा राजनीतिक भेटघाट गरे । उनका साथमा श्रीमति निकिता पौडेल र स्वकीय सचिव एवम् पार्टी केन्द्रीय सदस्य दीपक बेहोरा पनि आएका छन्। उनी १४ तारिख बिहीबार नेपाल फर्किने कार्यक्रम छ ।

रास्वपा ‘प्रवास नेपाली सम्पर्क विभाग युके’ का सभापति पवन शर्मा, प्रवास सम्पर्क विभागका महामन्त्री राजु कँडेल, प्रवक्ता विष्णु चालिसेसहित कमिटीका सदस्यहरूलगायतले विभिन्न स्थानमा आयोजना गरिएका कार्यक्रम संयोजन गरेका थिए । लामिछानेले बेलायत भ्रमणका क्रममा स्वीन्डन, बर्मिङहम, प्लमस्टिड र अल्डरसटमा सम्बोधन गरेका थिए ।