संस्थापक अध्यक्षबारेको भ्रामक कुरा सच्याउन पत्रकार महासंघलाई नेवा पत्रकार चितवनको अपिल

---

नेपाल पत्रकार महासङ्घ (तत्कालीन नेपाल पत्रकार संघ)को संस्थापक अध्यक्ष सत्यनारायण बहादुर श्रेष्ठ रहेको तथ्य स्पष्ट हुँदाहुँदै महासंघले सो सत्यतथ्य को बेवास्ता गरेकोले नेवा पत्रकार चितवन दबुले विरोध गरेको छ ।

नेपाली पत्रकारिताको इतिहासमा वि.सं.२००८ साल वैशाख ९ गते पहिलो पटक नेपाल पत्रकार सङ्घ गठन गरेर सभापतिका रूपमा नेपालका पत्रकारलाई सङ्गठित गर्दै नेतृत्व प्रदान गर्ने व्यक्ति सत्यनारायण बहादुर श्रेष्ठ नै हुन् । यो तथ्यलाई नामेट पार्नु भनेको उहाँको योगदानको अवमूल्यन गर्नु हो र इतिहासलाई नामेट पारेर नेपाल पत्रकार महासङ्घ नेपाली पत्रकारहरुको साझा र नेतृत्व संस्था हुन सक्दैन भन्दै  नेपाल पत्रकार महासङ्घले यस तथ्यलाई बेवास्ता गर्दै आएको कुरा दबुले एक वक्तव्य मार्फत जनाएको छ ।

यो विषय नेपाल पत्रकार महासङ्घलाई अवगत गराइसक्दा पनि गम्भीरतापूर्वक नलिएको सचिव सुनिल श्रेष्ठद्वारा हस्ताक्षरित विज्ञप्तिमा उल्लेख छ ।

गलत तथ्यलाई नै महासङघले निरन्तरता दिएको भन्दै महासङ्घको कदमप्रति फोनिज को केन्द्रीय कमिटीले पनि विरोध गरिसकेको छ ।

त्यसैगरी नेवाः पत्रकार राष्ट्रिय दबूले पनि महासंघलाई सो गलती सच्याउन अपिल गरेको छ ।