नेपालीहरु महानचाड नजिकीएसँगै स्वदेश भित्रिने क्रम बढ्दै

नेपाली महानचाड नजिकीएसँगै रोजगारीका लागि छिमेकी मुलुक भारत गएका नेपालीहरु घर फर्कन थालेका छन् ।बर्षौ देखि भारतको विभिन्न ठाउँमा जागिर गर्दै आएका नेपालीहरु चाडपर्व मनाउनका लागि घर फर्केका छन् ।

कैलालीको त्रिनगर नाकाबाट दिनहुँ नेपाली स्वदेश भित्रिने क्रममा एक सातामा छ हजार नौ सय ४७ जना नेपाली भित्रिएका सीमा सुरक्षा गुल्मका सशस्त्र प्रहरी नायब उपरीक्षक राजेश उप्रेतीले जानकारी दिए ।

उनका अनुसार – असोज १२ गते तीन सय १८, १३ गते तीन सय चार, १४ गते तीन सय ९८, १५ गते छ सय तीस, १६ गते छ सय ८०, १७ गते एक हजार ९०, १८ गते एक हजार पाँच सय ६९ र १९ गते एक हजार नौ सय ५८ जना नेपाली भारतका विभिन्न सहरबाट घर फर्किएका छन् ।

यात्रुहरुको आवतजावतमा सहजताका लागि बडादसैँ, तिहार र छठपर्वसम्म सीमा नाकामा यात्रु सहायता कक्ष निर्माण गरिएकोले यात्रीहरुलाई सहज भएको यात्रीहरु बताउछन् ।

सुदूरपश्चिम प्रदेशका कैलाली, कञ्चनपुरलगायत पहाडी जिल्लाका मानिस रोजगारका लागि भारतको मुम्बई, दिल्ली, पिथौरागड, नासिक, पञ्जाब, अहमदाबादलगायत ठूला सहरमा बिना भिसा जान पाइने र रोजगारी पनि सहजै प्राप्त हुने भएकाले पनि धेरैजसो नेपाली रोजगारीका लागि जाने गर्दछन् ।