जनता समाजवादी पार्टी चितवनको बैठक सम्पन्न: संगठन सुदृढ गर्न नयाँ योजना तयार

---

जनता समाजवादी पार्टी (जसपा) जिल्ला समिति चितवनको सचिवालय बैठक आइतबार भरतपुरमा सम्पन्न भएको छ। बैठक जिल्ला संयोजक अनुज जोशीको अध्यक्षतामा बसेको थियो भने पार्टी केन्द्रीय कार्यकारिणी समिति सदस्य, केन्द्रीय भोलेन्टियर्स फोर्स प्रमुख तथा चितवन जिल्ला अभियानका मुख्य अभियान्ता तारा विश्वकर्माको विशेष उपस्थिति रहेको थियो।

बैठकले जनता संग जसपा अभियानलाई अझ प्रभावकारी रूपमा अघि बढाउने निर्णय गर्दै आसन्न स्वतन्त्र विद्यार्थी युनियन (स्व. बि. यु.) निर्वाचनलाई ध्यानमा राखेर विद्यार्थी अभियानलाई थप सक्रिय बनाउने योजना बनाएको छ। विद्यार्थी नेताहरू अनरोध चौधरी, बिपिन चन्द रेग्मी र प्रसिद्ध तिवारीलाई यसको जिम्मेवारी दिइएको छ।

त्यसैगरी, बैठकले २०८१ फागुनको तेस्रो हप्ता जिल्ला अधिवेशन गर्ने निर्णय गरेको छ। पार्टी केन्द्रीय सल्लाहकार समितिमा प्रतिनिधिहरू सिफारिस गर्ने र जिल्ला कार्यालयलाई व्यवस्थित बनाउने विषयमा पनि सहमति जुटाइएको छ।

बैठकले संगठनलाई थप सुदृढ गर्दै स्थानीय तहमा पार्टीको उपस्थितिलाई प्रभावकारी बनाउने उद्देश्य लिएको छ।