शैक्षिक परामर्श केन्द्र सुधारको माग

शैक्षिक परामर्श केन्द्रको सुधारको माग राख्दै चितवनका तीन वटा विद्यार्थी संगठनले चितवनका प्रमुख जिल्ला अधिकारीलाई ज्ञापनपत्र बुझाएका छन् । लोकतान्त्रिक विद्यार्थी संघ, समाजवादी विद्यार्थी युनियन र अखिल(क्रान्तिकारी) चितवनले जिल्ला प्रशासन कार्यालय पुगेर आज (सोमबार) आठ बुँदा सहितको ज्ञापनपत्र बुझाएका हुन् ।

उनीहरुले निर्देशिका २०७३ अनुसार परामर्शदाता संस्थाहरुले विद्यार्थीहरुबाट शुल्क विवरण स्पष्ट रुपमा सार्वजनिक गर्नुपर्ने र अनुचित शुल्क लिनेहरुलाई कडा कारबाही गर्न माग समेत गरेका छन् ।
परामर्श संस्थाहरुले विदेश पठाइएका विद्यार्थीहरुको विवरण शिक्षा मन्त्रालयमा नियमित रुपमा अध्यावधिक गर्न समेत उनीहरुले माग गरेका छन् । शैक्षिक परामर्श केन्द्रले वैदेशिक शिक्षाका लागि पठाइने विद्यार्थीको सम्बन्धित कलेज विश्वविद्यालय विषय, तह शुल्क सम्बन्धी वार्षिक विवरण खुलाइ खर्च सहित अभिभावकसँग सम्झौता गर्नुपर्ने लगायतका माग उनीहरुले बुझाएको ज्ञापनपत्रमा उल्लेख गरिएको छ ।

लोकतान्त्रिक विद्यार्थी संघ चितवनका कार्यवहाक अध्यक्ष पवन पाख्रिन, समाजवादी विद्यार्थी युनियनका संयोजक सुमन श्रेष्ठ र अखिल(क्रान्तिकारी) चितवनका संयोजक सविन खड्काले हस्ताक्षर गरिएको विज्ञप्तीमा प्रचारप्रसार गर्दा दर्ता नम्बर अनुमति नखुलाई भ्रामक अनिश्चित, अपुष्ट र आधारहीन विषय राखी प्रचारप्रसार गर्न बन्न गर्न समेत माग गरिएको छ ।

चितवनका प्रमुख जिल्ला अधिकारी प्रकाश पौडेलले विद्यार्थी संगठनले राखेको मागलाई सम्बोधनका लागि सम्बन्धित ठाउँमा पठाउने बताए । उनीहरुले शिक्षा विज्ञान तथा प्रविधि मन्त्रालय, गृहम मन्त्रालय, परराष्ट्र मन्त्रालय, नेपाल राष्ट्र बैंक, नेपाल शैक्षिक परामर्श संघलाई समेत बोधार्थ पेश गरेका छन् ।