यस वर्षको मनसुन केही ढिलो बाहिरिने, दशैँ ‘हिले’ हुनसक्ने

यस वर्षको मनसुन सरदर मितिभन्दा केही ढिलो बाहिरिने मौसमविद्ले अनुमान गरेका छन् ।  मनसुन बाहिरिने मिति अक्टोबर २ तारिख भए पनि निर्धारित मितिभन्दा केही ढिला गरी बाहिरिने सम्भावना रहेको मौसमविद् सञ्जीव अधिकारीले जानकारी दिनुभयो ।

गएको वर्ष पनि मनसुन निर्धारित मितिभन्दा नाै दिन ढिला गरी अक्टोबर ११ तारिखमा बाहिरिएको थियो । अहिलेको अवस्थालाई हेर्दा अहिले मनसुनी गतिविधि निष्क्रियजस्तो देखिए पनि अबको केही दिनपछि मनसुन फेरि सक्रिय हुने सम्भावना छ ।

मनसुनी गतिविधि दशैँको नवमीदेखि सक्रिय हुने अनुमान गरिएको माैसमविद् अधिकारीले बताउनुभयो । उहाँका अनुसार अहिले बङ्गालको खाडीमा न्यून चापीय प्रणाली विकास हुने क्रममा रहेको छ । बङ्गालको खाडीमा न्यून चापीय प्रणाली विकास भएमा नेपालमा पनि पानी पर्ने सम्भावना रहिरहन्छ । त्यसकै कारण यस पटकको दशैँका मुख्य दिनहरूमा देशका विभिन्न भागमा मनसुनी वर्षा हुने सम्भावना छ ।

अहिलेसम्मको मौसमी गतिविधिका आधारमा यसपालिको दशैँ हिले हुनसक्ने मौसमविद्ले पूर्वानुमान गरेका छन् ।  अहिले पनि देशभर सामान्यदेखि पूर्ण बदली रही धेरै ठाउँमा सामान्यदेखि मध्यम खालको पानी परिरहेको  छ ।