प्रकाशमानको आह्वान– सुकुम्वासीमा भय सिर्जना गर्नेहरुलाई चुनावमा परास्त गर्नुस्

नेपाली कांग्रेसका नेता प्रकाशमान सिंहले भूमिहीन, सुकुम्वासी र अव्यवस्थित बसोवासीहरुलाई विनायोजना हटाउन खोज्नेहरुलाई आगामी चुनावमा परास्त गर्न आह्वान गरेका छन् ।

भूमि आयोगको प्रतिवेदन नआएसम्म र त्यसमा सरोकारवाला  सहमत नभएसम्म उनीहरुलाई जबर्जस्ती हटाउन नपाइने उनको भनाइ छ ।

आफूले अरु दलका नेताहरुले जस्तो झुठो आश्वासन नदिने बताउँदै उनले काठमाडौं जिल्लाको भूमि आयोगले प्रतिवेदन नदिएसम्म जबरजस्ती हटाउन नपाइने बताए । ‘तपाईंहरुले कत्तिको ख्याल गर्नु भएको छ, मैले यो कुरा संसदमा होस् वा सार्वजनिक कार्यक्रममा पनि बोल्दै आएको छु,’ उनले भने, ‘तपाईंहरुका इच्छा, आकांक्षा र चाहनालाई पूरा गर्नका लागि म प्रतिबद्ध छु ।’

उनले भूमिहीन र सुकुम्वासीहरुको समस्याको समाधान लोकतान्त्रिक–वाम गठबन्धनले मात्रै गर्ने जिकीरसमेत गरे ।

कुन चाहिं उम्मेदवारलाई जिताउँदाखेरि आफ्नो भविष्य राम्रो हुन्छ भन्ने लेखाजोखा गरेर आगामी मंसिर चार गतेको दिन मतदान गर्न आह्वान गर्दै उनले भने, ‘अस्थीरता र तपाईंहरुमा भय सिर्जना गर्न दुष्प्रयास गर्नेहरुलाई मेटाउनुस् ।’