४ कराेड ४० लाख रुपैयाँकाे स्राेत नखुलेपछि तत्कालीन मालपाेत अधिकृतविरुद्ध भ्रष्टाचार मुद्दा

भूमिसुधार तथा मालपोत कार्यालय ललितपुरका तत्कालीन मालपोत अधिकृत तथा अहिले मधेस प्रदेशको उद्योग, पर्यटन, वन तथा वातारण मन्त्रालयाका शाखा अधिकृत मीनबहादुर भट्टराईविरुद्ध भ्रष्टाचारको मुद्दा दायर भएको छ ।

भट्टराईले गैरकानुनी सम्पत्ति आर्जन गरेको आरोपमा ४ करोड ४० लाख रुपैयाँ बिगो र जरिबानासहित अख्तियार दुरुपयोग अनुसन्धान आयोगले आज विशेष अदालतमा मुद्दा दर्ता गरेकाे हाे ।

भट्टराईकाे पारिश्रमिक आय, अंशबन्डामा लिएको नगद, जग्गा बिक्री, शेयर बिक्री, ऋण सापटी लिएको, भत्ताबापत प्राप्त आय, कृषि आय, बीमा फिर्ता रकम, घर बहाल आय र गाडी बिक्रीसमेत गरी जम्मा वैध आय ५ करोड ९४ लाख ६७ हजार १ सय रुपैयाँ देखिएको छ । तर उनको विभिन्न ठाउँमा भएको लगानी, सम्पत्ति र बचत हेर्दा १० करोड २३ लाख ९२ हजार २ सय रुपैयाँ देखिएको थियो ।

कुल आयबाट वैध आय घटाउँदा बाँकी रहेको ४ करोड ४० लाख रुपैयाँको स्रोत नखुलेकाले भट्टराईविरुद्ध भ्रष्टाचारको मुद्दा दायर भएको अख्तियारले जनाएको छ ।